Nan videyo sa a, mwen esplike yon gwo diferans anpil moun pa pran tan pou yo konprann: “tube” pa menm bagay ak “mega tube”. Gen moun an Ayiti k ap gade top 10 radyo, klasman, konbyen moun rele pou mande mizik la, epi se konsa yo di yon mizik se yon tube. Wi, sa ka fè mizik la monte nan chart: li ka soti 40e, monte 20, rive 11, monte 7, epi finalman pase #1 pou 1-2 semèn. Sa se tube—li mache, li pran lè, men li toujou depann anpil de mekanis klasman yo ak pouse radyo yo. Men “mega tube” la, li diferan nèt. Mega tube a pa bezwen tout bagaj sa yo pou pwouve tèt li: depi li sòti, li monte top one, epi li ka kenbe plas la sou klasman lokal ak entènasyonal. Se mizik ki antre tout kote: radyo, diskotèk, match foutbòl, restoran—kèlkeswa kote w pase, se li w ap tande. Mwen bay egzanp klè: “4 Kampé” te yon mega tube, paske depi li sòti li te pran tout mache a, rive jwe menm sou radyo entènasyonal ki pa menm abitye pase mizik karayib. Se sa mwen rele mega tube: enpak total, sou tout platfòm, tout espas, tout moun.