Jai Mata Di, guys! Is video mein main aapko apne ghar ka Navratri Day 1 celebration dikhati hoon—bilkul wahi rituals aur feeling ke saath jo main bachpan se dekhte aayi hoon. Is saal main aur mere husband dono 9 days fasting pe the, aur Navratri se ek din pehle raat ko Ishani ko sulaane ke baad humne Mata Rani ka darbar set up karna start kiya. Last time mandir area mein lagaya tha, but is baar dining area choose kiya because mujhe thoda zyada space chahiye tha—aur honestly, 1 baje tak lagte-lagte darbar ready ho gaya. Next morning, sabse pehle maine Mata Rani ke shri charan banaye, unki pooja ki, aur ghar mein unka pravesh karwaya. Day 1 pooja mein time zyada lagta hai—Ganpati ji ka abhishek, Maa ka abhishek Gangajal aur panchamrit se, kalash sthapna, khetri (jware) beejna, navgrah pooja, aur akhand jyot—sab kuch hota hai. Kalash mein main wahi cheezein daalti hoon jo maine apne papa se seekha: Gangajal, haldi, akshat, chandan, chandi ka sikka, kamal gatte ke beej, laung, elaichi, supari aur phool. Maa Shailputri ki pooja ke din white pehna jaata hai, but maine red pehna—Mata Rani ka favorite. Darbar sajte hi ghar mein jo calmness aur divine vibe aati hai, woh mere liye Navratri ko life ka sabse special festival bana deti hai.