في هذا الفيديو خديتكم معايا في روندوني وسط جبال جرجرة، بصح الصراحة في الدقيقة الأخيرة تبدّل علينا البروغرام. كنت ناوي نطلع لقمة “Lalla Khedidja” (235 متر) اللي هي أعلى قمة في سلسلة جرجرة، بصح كي وصلنا لأسوال والضباب كان بزاف، قلت ما نقدرش نطلع بلاصة ما نعرفهاش وما نحبش نغامر بطلعة ماشي مضمونة. أنا ديما نقولها: نحب الجديد ونحب نوريلكم بلايص جديدة، بصح السلامة قبل كلش. دارنا روندوني خفيفة، صورنا شوية من المناظر والفيلاج اللي وسط الجبال، وكنت نحذّركم من الأرض اللي ولات زلقة من الشتا: لازم تمشي غير بالعقل. من بعد لحقاتنا الشتا بقوة والبرد تاع الثلج بدا يبان، لقينا بلاصة مخبيين فيها وفطرنا (مقرون)، وبعدها كملنا شوية حتى وصلنا لمنطقة فيها غابة ومكان تقدروا ديروا فيه كومبينغ (أنا العام اللي فات كمبينا تما). رغم تبديل الخطة والريح والبرد، نهارنا جاز هايل وتعلمنا بلي الطبيعة ديما تفرض شروطها.